De scriptoribus ecclesiasticis
p. 92
[115.]
De Diadocho – 390
Diadochus episcopus Photices scripsit insignem librum De perfectione, continentem capita centum.
Hic liber extat in Bibliotheca sanctorum Patrum, tomo quinto editionis 2.
[116.]
De Dorotheo archimandrita
Dorotheus archimandrita scripsit Sermones viginti quatuor, qui extant in Bibliotheca sanctorum Patrum, tomo 2 editionis 2.
Hi duo quando vixerint, non compertum habeo, quamuis antiquos fuisse satis constet.
[117.]
De Ruffino presbytero – 390
Ruffinus presbyter Aquileiensis, sancti Hieronymi quondam amicissimus, deinde aemulus factus, scripsit libros duos Historiae ecclesiasticae, quos addidit ad Historiam Eusebii Caesariensis a se conuersam ex Graeco.
Scripsit etiam Explicationem symboli apostolici, item In Psalmos aliquot Commentaria, inuectiuas duas in sanctum Hieronymum & Apologiam pro Origene, in qua multa mentitur, ipso Hieronymo teste in Secunda Apologia.
Scripsit quoque multas epistolas.
Haec omnia extant, partim inter opera sancti Hieronymi, partim in Historia Eusebii, partim etiam seorsim.
Vertit quasdam sententias Sixti philosophi Pythagorici, easque tribuit sancto Sixto pontifici & martyri, ut testatur Hieronymus in epistola ad Ctesiphontem.
Sanctus etiam Augustinus ex versione Ruffini deceptus, eas sententias esse putauit sancti Sixti martyris, quod retractat libro 2 Retractationum cap. 46.
Hae sententiae extant in tomo quinto Bibliothecae sanctorum Patrum, editionis secundae.
Vertit praeterea in latinam linguam Recognitiones Clementis, ut Gennadius testatur in libro De viris illustribus.
Sed sicut ipsae Recognitiones falso fortasse tribuuntur Clementi, ita etiam non est incredibile, falso adiunctam illis fuisse praefationem Ruffini, quasi interpretis, denique Ruffinus merito notatur erroris a Gelasio papa, cap. Sancta Romana, distinct. 15.
[118.]
De Palladio Galata – 390
Palladius Galata, Ruffini aequalis & amicus fuit, ut ex operibus eius intelligi potest.
Scripsit Historiam Lausiacam & Paradisum Heraclidis, in quibus describuntur breuiter multorum Sanctorum vitae, quae non
