De scriptoribus ecclesiasticis
p. 72
Hieronymus nouem tantum meminit.
Duae postremae tribuuntur Gregorio Nysseno, qui opus Basilii imperfectum perficere studuit.
Sed falli videntur, qui decimam & undecimam homiliam Gregorio tribuunt, & Basilii esse negant, nam ipse Gregorius in libro suo De opere sex dierum extremo dicit quidem in supplementum operis Basilii composuisse se librum De opificio hominis, sed non duas homilias, & liber ille extat inter opera Gregorii Nysseni, sed diuersus omnino ab illis duabus homiliis Basilii.
Scribit S. Hieronymus in libro De scriptoribus ecclesiasticis, Homilias Basilii de opere sex dierum, esse nouem, sed hoc dicit quia Basilius nouem tantum initio scripsit, sed postea addidit alias duas, quarum initium est: »Veteris debiti solutionem«, &c.
Vide infra in »Obseruatione in opera Greogrii Nysseni«.
In secundo tomo ponitur liber unus De Paradiso, sed in editione Antuerpiensi anni 1568 ponuntur homiliae quatuor.
Item in secundo tomo ponuntur libri tres Contra Eunomium, sed in editione Antuerpiensi, libri quinque, & quamuis duos ultimos libros Erasmus sustulerit, ut indignos Basilio, alii tamen Basilio non indignos censent.
In tertio tomo sunt Quaestiones compendio explicatae, quae non sunt indubitatae.
Nicephorus enim libro 9 cap. 16 & libro 13 cap. 29 & Sozomenus libro 3 cap. 13 dicunt, a multis tribui Eustathio Sebasteno Ascetica Basilii, id quod de quaestionibus compendio explicatis intelligendum videtur, nam q. 1 & 95 videtur damnare traditiones, quas Basilius acriter defendit in libro De Spiritu sancto cap. 27 item q. 4 & 293 videtur tollere de medio discrimen peccati mortalis & venialis, quod certe S. Basilio tribui non potest.
Additur etiam in editione Anuerpiensi Commentarius S. Basilii in 16 capita Isaiae prophetae & alia quaedam minutiora, tum in ea editione, tum in aliis adduntur.
[101.]
De Andrea episcopo Caesareae
Andreas episcopus Caesareae Cappadociae vir doctus scripsit Commentaria in Apocalypsim, quae extant in Bibliotheca S. Patrum tomo primo editionis secunda.
Quando vixerit non est omnino certum, sed hoc loco eum posuimus, quia post S. Basilium episcopus Caesariensis fuit, eumque saepe citat & omnium consensu antiquus scriptor habetur, ex quo Arethas Caesariensis compendium suum decerpsit in Apocalypsim.
