Testamenti veteri
p. 21
Porro in libris antiquitatum comprehendit Iosephus historiam sacram a Genesi usque ad Machabaeos & deinde addidit reliquam historiam usque ad sua tempora.
Libro autem 18 antiquitatum c. 4, reddit Christo mirabile testimonium, affirmans eum fuisse plusquam hominem, & vere Christum, in operibus magnificum, in verbis veracissimum, & a Pilato quidem occisum, sed tertia die resurrexisse, cuius testimonii meminit Eusebius libro 1 historiae ecclesiasticae cap. 11 & S. Hieronymus in libro de scriptoribus ecclesiasticis in Iosepho.
Quod autem Hebraei dicunt, testimonium illud de Christo in suis libris non haberi & ideo videri superadditum a christianis; facile refelli potest.
Nam Hebraei non habent Iosephum filium Matathiae, qui Graece scripsit libros antiquitatum, de quo nos loquimur, sed Iosephum filium Gorionis, qui aliquid simile scripsit Hebraice, proinde non est mirum, si Iudaei in suo Iosepho hoc testimonium non habeant, cum i nostro habeatur & non sit superadditum, sed verum & germanum Iosephi testimonium.
Certe S. Hieroymus & Eusebius viri doctissimi fuerunt & omnes pene libros veterum scriptorum legerunt.
& nunquam hoc testimonium de Christo, Iosepho tribuissent, nisi sciuissent vere ab illo auctore ita scriptum fuisse.
Omisi libros Rabinorum, qui plurimi sunt, quoniam pleni sunt fabulis Iudaicis & erroribus perniciosis, neque verum esse arbitror, quod Ioannes Garetius & alii nonnulli scribunt, Rabinos aliquot, quorum opera nunc extant, scripsisse ante aduentum Christi; video enim passim ab iis mentionem fieri euersionis Hierusalem & templi per Titum Vespasiani filium.
