De scriptoribus ecclesiasticis
p. 228
Aduersus Ioannem Rochesanum, haereticum Hussitam.
Scripsit denique epistolas ad varios.
[319.]
De Alphonso Tonstato – 1440
Alphonsus Tonstatus natione Hispanus episcopus Abulensis, vir sanctitate & doctrina celeberrimus, vixit tempore Eugenii quarti pontificis, circa annum Domini 1440.
Scripsit Commentaria copiosissima in Pentateuchum, in Iosue, Iudices & Ruth, necnon in libros Regum & Paralipomenon & in euangelium sancti Matthaei, in quibus Commentariis dissoluit quaestiones innumerabiles, ut merito de eo scriptum sit: »Hic stupor est mundi, qui scibile discutit omne« & quod magis est admirandum, tanta scripsit breuissimo tempore, cum non vixerit nisi annos quadraginta.
Neque solum Commentaria illa scripsit, sed etiam opuscula plurima, e quibus extant:
Defensorium trium conclusionum.
Liber De sancta Trinitate.
Liber Contra sacerdotes concubinarios.
Paradoxa.
Explicatio verborum Isaiae: »Ecce virgo concipiet«.
Liber De statu animarum post mortem.
Liber De optima politica.
[320.]
De Blondo historico – 1440
Flauius Blondus patria Foroliuiensis, a secretis fuit Eugenio quarto summo pontifici, & scripsit Historiam Romanam, in qua multa ecclesiastica continentur ab inclinatione imperii usque ad sua tempora, id est ab anno domini 407 usque ad annum 1400.
[321.]
De Nicolao Panormitano – 1440
Nicolaus Tudescus, natione Siculus, patria Catanensis, ordinis S. Benedicti, abbas & postea archiepiscopus Panormitanus, ac demum S. R. E. cardinalis creatus, sed in schismate a Felice quinto antipapa.
Vir fuit iuris canonici peritissimus & plurima scripsit, quae tomis octo comprehenduntur in editione Veneta anni 1592.
In primo & secundo tomo habentur Commentaria in primum librum Decretalium.
In tertio, quarto & quinto tomo habentur Commentaria in secundum librum Decretalium.
