De scriptoribus ecclesiasticis
p. 196
[333.]
De Alexandro de Hales – 1245
Alexander Halensis, natione Anglus, ordinis sancti Francisci, vir doctissimus & sanctorum Bonauentura & Thomae Aquinatis praeceptor, scipsit iussu Innocentii papae quarti Summam theologiae egregiam & copiosissimam, quae notissima est.
Scripsit Postillam in tota Biblia, nec non summam virtutum.
Obiit anno Domini 1245, ut testatur Petrus Rodulphus a Tossiniano in Historia seraphica.
[334.]
De Hugone de S. Caro – 1245
Hugo de sancto Caro, natione Burgundus, ordinis Praedicatorum, cardinalis sanctae Sabinae ab Innocentio quarto Pontifice creatus fuit anno Domini 1244 & pie ac sancte obiit anno 1264.
Scripsit Commentaria breuia in uniuersa sacra Biblia.
Scripsit etiam seorsim in Psalmos, quamuis omnino non constet an Commentaria illa in Psalmos sint huius Hugonis, an Alexandri Halensis.
Item Hugo excogitauit concordantias Bibliorum, teste sancto Antonino 3 par. Summae historialis tit. 19 cap. 1 § 2 & per homines a se delectos opus laboriosissimum perfecit, cui operi (ut facile est inuentis addere) posteriorum industria multa addidit.
[335.]
De Humberto, quinto Generali Praedicatorum – 1245
Frater Humbertus, patria Viennensis, natione Gallus, quintus Generalis ordinis Praedicatorum, aequalis fuit Hugonis, quem etiam traxit ad ordinem S. Dominici.
Scripsit multa utilia & ualde pia, videlicet:
Expositionem Regulae sancti Augustini.
Librum de votis essentialibus religiosorum.
Librum de eruditione concionatorum.
Alium De officiis ordinis Praedicatorum a Generali usque ad Ianitorem.
Alium De vitis primorum patrum sui ordinis.
Denique sermones multos valde utiles, qui nuper, id est anno 1603 recusi sunt Venetiis.
[336.]
De Matthaeo Parisiensi – 1245
Matthaeus Paris, siue potius Parisiensis (sic enim vocatur in ipso eius libro, & in indice libri) fuit monachus Albanensis in Anglia
