Page:De scriptoribus ecclesiasticis liber unus (1613).pdf/158

From GATE
This page has not been proofread



De scriptoribus ecclesiasticis

p. 140



dicitur Iulianus Pomerius, quem Gennadius Massiliensis in Catalogo illustrium virorum, scribit, suo tempore vixisse, id est ante annum Domini 500 atque hic videtur esse ille, quem tam saepe citat in suo Prognostico sanctus Iulianus archiepiscopus Toletanus, de quo nunc agimus. Alter fuit Iulianus Pomerius diaconus, qui praefationem addidit ad libros S. Hildephonsi, de quo paulo ante meminimus. Hic autem sanctus Iulianus viuebat aera 724, id est anno Domini 686. Sed cum auctor huius operis in epistola ad regem Eruigium se Iulianum Pomerium nominet, non video, cur non ipse Iulianus Pomerius dici possit, ut sint tres Iuliani Pomerii, unus presbyter, alter diaconus & tertius episcopus.


[208.] De Anastasio Nicaeno

Anastasius Nicaenus episcopus vixit post concilium Trullanum, quinisextum a Graecis nuncupatum, quia canones addidit concilo quinto & sexto generali. Citat enim hic auctor canonem secundum Trullanum. Scripsit Reponsionem ad interrogationes de multis capitibus ecclesiasticis. Vide Bibliothecam sanctorum Patrum, tomo primo editione secunda, ubi notae marginales caute legendae, aut potius delendae sunt, quia non sanam doctrinam continent.


Seculum octauum ab anno 700 ad 800


[209.] De S. Gregorio iuniore – 714

Sanctus Gregorius papa secundus, siue iunior, sedere coepit anno salutis 714, sedit annos 17, obiit anno 731. Scripsit varia opera, sed extant solum epistolae doctissimae & multae, quarum una ad sanctum Germanum extat in septima synodo act. 4. duae Graece & Latine ad imperatorem Leonem Isauricum, extant apud Card. Baronium, tomo Annalium 9 ad annum 13. Gregorii secundi apud eundem extant epistolae ad Bonifacium anno undecimo pontificatus & ad Carolum Martellum, ad Turingos, ad Saxones & ad alios annos decimo pontificatus.


[210.] De S. Anthelmo

Sanctus Anthelmus, siue Adelmus, episcopus fuit in Scotia & anno Domini 700 sedere coepit, ex Beda, libro 5 Historiae cap. 19. Scripsit De virginitate librum, qui extat in Bibliotheca sanctorum Patrum tomo tertio editione secunda. Scripsit etiam De Paschatis die contra errores Britonum, teste Beda. Eius vita habetur apud Surium die 28 Maii.