Undet cruoris fluctibus vastum mare:
sorbebo totum, nec redundabit sinus.
Loyola pereat: caesa vindictae hostia
venis cruoris gurgitem totis vomat.
Vix unus istam proluet totus sitim.
ALP. -Agnosco reduces indolis magnae notas.
Reducem Navarrum agnosco, rediisti tibi;
frustra coercet flammeos partus cinis,
nec tecta longum flamma, nec virtus latet.
Sat est. Petamus judicem: tempus volat,
tu sequere, Nigri, debeo Navarrum tibi.
NIG. -Animamque debes, exigam cum faenore. 1. [1],
SANCTUS IGNATIUS
QUIRINUS
deplorat. Eum S<anct>us Ignatius ostensis
coeli prodigiis consolatur.
QUI. 1. [2]-Rara est amicus gemma; desertis agris
Arabia plures, credo, Phoenices alit.
Est rarus ales. Vix amicorum duo
saeclum recenset paria: vix unum parit.
Infida passim turba tibi plaudit sequax
dum caeca frontis explicat nubem Dea:
Si torva vultum nubilat, fallax procul
caterva cedit. Urbis o sacrae probrum!
En ipsa tandem Roma Loyolam fugit.
Pridem ferebat aetheris ad alti Tholum,
nunc usque ad imum deprimit Lethes vadum