Eclipses magnae & frequentes necessario sterilitatem afferunt, quia terram refrigerant, & exsiccant. Evidentior est calamitas, si aucto frigori succedunt imbres & inundationes.
Dominus Eclipsis magnam habet in ea potentiam; ideo illius natura est attendenda. Hinc Saturnus Eclipsis dominus causat corruptionem a frigore, efficit morbos longos, tabes, catharros, fluxus, febres quartanas, aliaque id genus. Iupiter Eclipsis dominus dat abundantiam utilium ac necessariorum, interitum noxiorem, aeris temperiem salubrem, & alia eiusmodi. Mars Eclipsis dominus affert morbos biliosos, sanguinis eruptiones, infirmitates acutas, febres tertianas, ventos calidos & pestiferos, fulmina, turbines, siccitatem, maris aestum insolitum, frugum sterilitatem, & alia multa. Venus affert foecunditatem, ventos temperatos, humiditatem salubrem, tempestivas pluvias, aquarum utiles inundationes &c. Mercurius morbos siccos, febres quotidianas, phtises, tusses, anhelitus difficiles, ventos validos & inordinatos, tonitrua ignita &c. Plura videat, qui volet, apud Ptolemaeum, Caardanum, & alios Astrologos. Pergo tandem ad alia.
Sex Tabellas continet quarta Classis, quibus inscripti sunt dies omnium totius anni mensium, & gradus Signorum Zodiaci, quos Sol diebus illis percurrit. Et sex quidem facies anteriores Tabellarum continent sex priores anni menses ac
